နိုင်ငံကို ကျူးကျော်တိုက်ခိုက်မှုများအား သေသည်အထိ တုန့်ပြန်သွားမည်ဟု ဂဒါဖီပြောကြား
လစ်ဗျားအာဏာရှင် မူအမ်မာ ဂဒါဖီက ၎င်းသည် မိမိနိုင်ငံသို့ ကျူးကျော်တိုက်ခိုက်လာမှုများကို သေသည်အထိ တုန့်ပြန်သွားမည်ဖြစ်ကြောင်း ကြေညာလိုက်သည်။ အစိုးရ ရုပ်မြင်သံကြား ဌာနများမှတဆင့် ဗိုလ်မှူးကြီး ဂဒါဖီက ၎င်းသည် လစ်ဗျားတွင် ဆက်နေပြီး NATOတပ်ဖွဲ့အား တိုက်ပွဲဝင်သွားမည်ဟု သံဓိဌာန် ချထားကြောင်း ပြောကြားလိုက်သည်။ သူရဲဘောကြောင်ပြီး ရှင်သန်မှုသည် ရဲဝံ့စွာ သေရခြင်းထက် အဆပေါင်း သန်းနှင့်ချီ မြင့်မြတ်သဖြင့် မိမိသည် တိုက်ပွဲဝင်ရန် တွန့်ဆုတ်နေမည် မဟုတ်ကြောင်းလည်း ဂဒါဖီကဆိုသည်။ NATOတပ်ဖွဲ့သည် လက်ရှိတွင် ဂဒါဖီ ခိုအောင်းနေသော ထရီပိုလီမြို့တော်ကို အပြင်းထန်ဆုံး ပစ်မှတ်ထား တိုက်ခိုက်လျက်ရှိသည်။ ဇွန်လ ၆ ရက်နေ့က ခပ်နိမ့်နိမ့် ပျံသန်းလာသော ဂျက်တိုက်လေယာဉ် ၂၀ ခန့်တို့သည် ဂဒါဖီ၏ အိမ်တော်နှင့် စစ်ဖက်ဆိုင်ရာ ပစ်မှတ်များကို ဗုံးကြဲခဲ့သည်။ လက်ရှိတွင် လစ်ဗျားအရေး ပဋိပက္ခများကို အဆုံးသတ်နိုင်ရန် ကြားဝင်နိုင်ရေး စတင်လုပ်ဆောင်နေပြီဖြစ်သည်။ ဂဒါဖီက လစ်ဗျားပြည်သူများသည် မိမိတို့၏ ရန်သူများကို သုတ်သင်ရန် အသင့်ရှိနေကြောင်း ဂဒါဖီက ကြွေးကြော်နေသည်။ ၎င်းက NATOတပ်ဖွဲ့အား ရည်ရွယ်ပြီး လက်နက်ကိုင် အနိုင်ကျင့်နေမှုဖြင့် လစ်ဗျား၏ စစ်မှန်သော လွတ်လပ်ရေးကို ထိပါးနိုင်မည် မဟုတ်ကြောင်း ပြောကြားခဲ့သည်။ NATOတပ်ဖွဲ့များတွင် အမေရိကန်၊ ဗြိတိန်နှင့် ပြင်သစ်တို့က အဓိက ဦးဆောင်နေပြီး ဂဒါဖီ၏ အိမ်တော်ကို ဗုံးကြဲရာတွင် ဘန်ကာဖျက် ဒုံးများကိုပါ အသုံးပြုလျက်ရှိကြောင်း သိရသည်။
No comments: